ବଚ୍ଚାଲାଲ୍ (ଉନ୍ମେଷ) : ସାଇପଡ଼ିଶା : କବିତା : ଜାତି କ’ଣ : ମର୍ମାନୁବାଦ : ଅକ୍ଷୟ କୁମାର ସାମାଲ

ଜାତି କ’ଣ

ମୂଳ ହିନ୍ଦୀ : ବଚ୍ଚାଲାଲ୍ (ଉନ୍ମେଷ)
ମର୍ମାନୁବାଦ : ଅକ୍ଷୟ କୁମାର ସାମଲ

ଏ ବାବୁ ତୋର ଜାତି କ’ଣ ?
ଦଳିତ ହଜୁର !
ନା… ମାନେ କେଉଁ ଉପଜାତିରେ ଆସୁ ?
ହଜୁର !
ଆପଣଙ୍କ ଘୃଣା ଓ ଗାଳିରେ ଆସୁ,
ପୁତିମୟ ନାଳିରେ ଆସୁ
ଆଉ ପଙ୍ଗତରେ ଆମ ପାଇଁ ରଖାଯାଇଥିବା
ଅଲଗା ପତ୍ରରେ ଆସୁ !
ନିଶ୍ଚିୟ ହିନ୍ଦୁ ହୋଇଥିବୁ…??
ହଁ ହିନ୍ଦୁ ହୁଏ ହଜୁର !
କେବଳ ନିର୍ବାଚନ ସମୟରେ !

ତୁ ଖାଉ କ’ଣ ?
ଯାହା ଜଣେ ଦଳିତ ଖାଏ, ହଜୁର !
ନା… ମାନେ ଆହାରରେ କ’ଣ କ’ଣ ଖାଉ ?
ଆପଣଙ୍କଠୁ ମାଡ଼ ଖାଉ !
ଋଣଭାରର ଯନ୍ତ୍ରଣା ଖାଉ !
ଅଭାବରେ ବେଳେ ବେଳେ ଲୁଣ
ନହେଲେ ଡଷ୍ଟବିନ୍‌ରେ ପଡ଼ିଥିବା ଅମୃତ ଖାଉ !
ନା.. ମତେ ଲାଗିଲା ମାଛମାଂସ ବି ଖାଉଥିବୁ ?
ହଁ ହଜୁର ଖାଏ !
କେବଳ ନିର୍ବାଚନ ବେଳେ ।

ତୁ କ’ଣ ପିଉ ?
ଯାହା ଜଣେ ଦଳିତ ପିଏ ହଜୁର !
ନା… ମାନେ ଶୋଷ ଲାଗିଲେ କ’ଣ ପିଉ ?
ହଜୁର…
ଛୁଆଁ ଅଛୁଆଁର ଗ୍ଲାନି ଆଉ ଅବସାଦ !
ମରି ଯାଉଥିବା ସ୍ବପ୍ନର ଯନ୍ତ୍ରଣା,
ଆଉ ଖାଲି ଆଖିରେ ଦେଖୁଥିବା ମରିଚୀକା !
ନା.. ମତେ ଲାଗିଲା ମଦ ପିଉଥିବୁ ?
ପିଏ ହଜୁର
ଏଇ ଆପଣଙ୍କ ନିର୍ବାଚନ ଆସିଲେ ।

ତତେ କ’ଣ ମିଳେ ?
ଯାହା ଦଳିତକୁ ମିଳେ ହଜୁର !
ନା.. ମାନେ କି କି ଉପହାର ମିଳେ ?
ଅପମାନ ଆଉ ଲାଞ୍ଛନାପୂର୍ଣ୍ଣ ଜୀବନ,
ଛାଡ଼ିଯାଇଥିବା ଆପଣଙ୍କ ଆବର୍ଜନା,
ଦରକାର ପଡ଼ିଲେ ଆପଣଙ୍କ ଭଳି
ପରଜୀବୀଙ୍କ ପ୍ରଣାମ,
ଆଉ ଅତିଥି କରି ଆମ ଗୋଡ଼ ଧୋଇଦେବାର
ଛଳନା ପୂର୍ଣ୍ଣ ଅଭିନୟ !
ନା.. ମତେ ଲାଗିଲା ମିଳୁଥିବ କିଛି ପ୍ରତିଶ୍ରୁତି !
ହଁ.. ହଁ.. ହଜୁର ମିଳେ
କିନ୍ତୁ ଆପଣଙ୍କ ନିର୍ବାଚନ ଇସ୍ତାହାରରେ ।

ତୁ କରୁଛୁ କ’ଣ ?
ଯାହା ଦଳିତ କରେ ହଜୁର !
ନା.. ମାନେ କ’ଣ କ’ଣ କାମ କରୁ ?
ଶହେ ଦିନରେ ପୋଖରୀ ଖୋଳିବାର କାମ !
ଝାଳନାଳ ହୋଇ
ସକାଳକୁ ସନ୍ଧ୍ୟା କରିବାର କାମ !
ପାଇଖାନା ମଇଳା ମୁଣ୍ଡରେ ବୋହିବା କାମ
ଆଉ ଆପଣମାନଙ୍କ ପାଦତଳେ
ଲମ୍ବ ହୋଇ ପଡ଼ିବାର କାମ !
ମତେ ଲାଗିଲା
ନା.. ଆଉ କିଛି କରିଛୁ ବଡ଼ କାମ ?
ହଁ କରିଛି ହଜୁର…
ଆପଣଙ୍କ ନିର୍ବାଚନ ପ୍ରଚାର କାମ ।

କୋଏଲ ନଗର, ରାଉରକେଲା, ମୋ: ୮୮୯୫୦୯୩୭୨୪