ବିପିନ୍ ଲେଙ୍କା : ଗଳ୍ପ : ମାମା

ମାମା
।। ବିପିନ୍ ଲେଙ୍କା ।।

ମନେ ପଡ଼ିଲା…

ସେଦିନ ପ୍ରିନ୍ସପାଲ୍ ପିଅନ ହାତରେ ମୋତେ କ୍ଲାସ ଅଧାରୁ ଡକେଇ ଆଣିଥିଲେ ତାଙ୍କ ରୁମକୁ ।  ସେଠି କୁନାମାମା ଅପେକ୍ଷା କରିଥିଲେ । କାହିଁକି କେଜାଣି କୋଳେଇ ନେଇ ବହେ ଚୁମି ପକେଇଲେ ମତେ ଓ ମଟରସାଇକେଲରେ ବସେଇ ଆମ ଘରକୁ ନେଇଆସିଲେ । ଘରେ ବନ୍ଧୁ ବାନ୍ଧବ ଓ ସାଇପଡ଼ିଶାଙ୍କ ଭିଡ଼ଥିଲା । ହଠାତ୍ ଯେମିତି ଅଘୋଷିତ ନିରବତାଟିଏ କଳା ବାଦଳଭଳି ଢ଼ାଙ୍କି ଦେଲା ସାରା ପରିବେଶକୁ ମୋ ଆସିବାକ୍ଷଣି। ଆଖିରେ ଆଖିରେ କିଛି କହିଲାଭଳି ସମସ୍ତେ ମୋ ଆଡ଼କୁ ଅନଉଥିଲେ, ସତେ ଯେମିତି ବାହା ପସାରି ବୁକୁରେ ଆବୋରି ନେବେ । ପରିବେଶଟା ମୋ ଭିତରେ ଏକ ଅଜବ୍ ବୋଧ ସୃଷ୍ଟି କରୁଥିଲା । ମୁଁ କିଛି ପଚାରିବା ଆଗରୁ ଡଲିଆଣ୍ଟି ମୋତେ କାଖେଇଧରି କୁନାମାମାଙ୍କ ଗାଡ଼ିରେ ତାଙ୍କ ଘରକୁ ନେଇଯାଇଥିଲେ । ମୁଁ ପ୍ରଚୁର ମାତ୍ରାରେ ଭଲପାଉଥିବା ଡଲିଆଣ୍ଟିଙ୍କ କଥାକୁ ବାଧ୍ୟ ଶିଶୁଟିଏ ଭଳି ନିଃସର୍ତ୍ତ ମାନିନେଇଥିଲି;  ମୋ ମାମାଙ୍କ ଦେହ ବାରମ୍ବାର ଖରାପ ହେଉଥିବାରୁ ଚିକିତ୍ସା ପାଇଁ ତାଙ୍କୁ ନ୍ୟୁୟର୍କ ବଡ଼ପାପାଙ୍କ ଘରକୁ ନିଆଯାଉଛି ଓ ଭଲହୋଇ ସେ ଶୀଘ୍ର ଫେରିଆସିବେ ।

ବିଦେଶରେ ମାମାଙ୍କ ଚିକିତ୍ସା କାରଣରୁ ଡଲି ଆଣ୍ଟି ମୋର ଦିନଚର୍ଯ୍ୟା ସହ ଗପ ଗୀତ ଶୁଣେଇ ଖୁଆଇବା ଶୁଆଇବା ଇତ୍ୟାଦି ସବୁ କାମ କରିଦିଅନ୍ତି । ଡଲିଆଣ୍ଟିଙ୍କ ସେବା ଯତ୍ନ ହେତୁ ମାମାଙ୍କ ସାନ୍ନିଧ୍ୟ ବିନା ଅଗତ୍ୟା ଚଳିବାକୁ ମୁଁ ଧିରେ ଧିରେ ଦେହସୁହା କରିନେଉଥିଲି। କିନ୍ତୁ କିଛି ମାସ ପରେ ଯେତେବେଳେ ମୋର ଦେଖାଶୁଣା ଦାୟିତ୍ବ  ଆୟାଆଣ୍ଟିଙ୍କ ହାତକୁ ଚାଲିଗଲା, ମୁଁ ମାନିବାକୁ ଆଦୌ ପ୍ରସ୍ତୁତ ହୋଇନଥିଲି । ଡଲିଆଣ୍ଟିଙ୍କୁ ଜାବୁଡ଼ିଧରି ଅଳି ଅର୍ଦଳି କରିଥିଲି । ପ୍ରଥମେ ପ୍ରଥମେ ଡଲିଆଣ୍ଟି ମୋତେ ବୁଝେଇବାକୁ ଚେଷ୍ଟା କରିଥିଲେ। କିନ୍ତୁ ମୁଁ ନମାନିବାରୁ, ମୋତେ ମାଡ଼ମାରି ଆୟାଆଣ୍ଟିଙ୍କ କଥାମାନି ଚଳିବାକୁ ସେ ଧମକେଇବା ଆରମ୍ଭ କରିଦେଲେ । ଡଲିଆଣ୍ଟିଙ୍କ ହାବଭାବ ମୋ ପ୍ରତି ବଦଳିଲା ବଦଳିଲା ଲାଗୁଥିଲା । ତାଙ୍କ ହତାଦର ଓ ମରାପିଟାରେ ଆହତ ହୋଇ ଦିନେ ପାପାଙ୍କୁ କାନ୍ଦି କାନ୍ଦି ଡଲିଆଣ୍ଟି ମାରୁଥିବା କଥା ଜଣେଇଥିଲି । ଭାବିଥିଲି, ମୋ କାନ୍ଦକୁ ଜମା ସହିନପାରି ମାମାଙ୍କୁ ଗାଳିଦେବା ଭଳି ପାପା ଡଲିଆଣ୍ଟିଙ୍କୁ ବି ଗାଳି ଦେବେ ଓ ତାଗିତ୍ କରିବେ । କିନ୍ତୁ ପାପା ଓଲଟା ମତେ ବୁଝେଇଥିଲେ, ଡଲିଆଣ୍ଟିଙ୍କ କହିବା ମାନିବାକୁ ।

ଆଗେ ଡଲିଆଣ୍ଟି ଆମ ଘରକୁ ଆସିଲେ ଅନ୍ୟ ରୁମରେ ଶୋଉଥିଲେ । କିନ୍ତୁ ମାମା ଯିବାର କିଛି ମାସ ପରେ ସେ ଆମ ରୁମରେ ଶୋଇବାକୁ ଲାଗିଲେ । ଏମିତି ହେଲା, ରାତିରେ ମୁଁ ଶୋଉଥିଲି ତ ପାପାଙ୍କ ଛାତିରେ ମୁଣ୍ଡ ରଖି, କିନ୍ତୁ ସକାଳେ ଉଠୁଥିଲି ଆୟାଆଣ୍ଟିଙ୍କ ବିଛଣାରୁ ଅନ୍ୟ ରୁମରେ ।

କିଛି କିଛି ଦିନର ବ୍ୟବଧାନରେ ଯେତେବେଳେ ଡଲିଆଣ୍ଟି ମୋତେ ନିସ୍ତୁକ ମାଡ଼ ମାରନ୍ତି, ମୁଁ କାନ୍ଦି କାନ୍ଦି ମାମା ପାଖକୁ ଯିବାକୁ ଜିଦ୍ ଧରେ ତ କେତେବେଳେ ମାମାକୁ ଫେରେଇ ଆଣିବାକୁ ଅଡ଼ି ବସେ । ଦିନେ ପାପାଙ୍କ ଅଜଣାତରେ ତାଙ୍କ ଫୋନରୁ ବଡ଼ପାପାଙ୍କ ନମ୍ବର ଖୋଜି ଲଗେଇ ଦେଲି । ବଡ଼ପାପାଙ୍କୁ ସବୁକଥା ଏକା ନିଶ୍ବାସରେ କହିଦେଇଥିଲି । ମୋକଥା ଶୁଣି ସେ ଖୁବ୍ ଦୁଃଖୀ ହୋଇଯାଇଥିଲେ ଓ ବୁଝେଇ ସୁଝେଇ ମୋତେ ସାନ୍ତ୍ବନା ଦେଇଥିଲେ । କିନ୍ତୁ ମାମା ସହ କଥାହେବାକୁ ମୁଁ ଚାହିଁବାରୁ କହିଥିଲେ, ଓୌଷଧ ଖାଇ ସେ ଶୋଇଛନ୍ତି, କାହା ସହ କଥା ହେବାକୁ ଡାକ୍ତର ମନାକରିଛନ୍ତି । ମୋ ମାମାର ଶୀଘ୍ର ଆରୋଗ୍ୟ ମନାସି ମୁଁ ସେଦିନ ତାଙ୍କୁ ବି ମାନିନେଇଥିଲି ।

ଦିନେ ପାପାଙ୍କ ଆଗରେ ଡଲିଆଣ୍ଟି ମୋତେ ମାରିଲେ । ଲୁହ ଲତ୍-ପତ୍ ଉଦାସୀ ଆଖିରେ କୋରେଇହୋଇ କାନ୍ଦି କାନ୍ଦି ପାପାଙ୍କ ପାଖକୁ ଯିବାକୁ ହାତ ପାରିଥିଲି, କିନ୍ତୁ ଡଲିଆଣ୍ଟି ମୋତେ ଯିବାକୁ ଦେଲେନି କି ପାପା ଆଣ୍ଟିଙ୍କ ହାତରୁ ମୋତେ ଛଡ଼େଇ ପାଖକୁ ନେଲେନି । ସେ ମହୂର୍ତ୍ତରେ ଲାଗିଲା, ମୋର ନିଜର ବୋଲି ସେଠି କେହି ନାହିଁ । ଡର ଓ ମାଡ଼ରେ ଅଧୀରହୋଇ ମାମାଙ୍କୁ ଫେରେଇ ଆଣିବାକୁ ପାପାଙ୍କୁ କୋହଭରା କଣ୍ଠରେ ନେହୁରା ହେଲି। ଏତିକିରେ ଡଲିଆଣ୍ଟିଙ୍କ ରାଗ ଚରମରେ ପହଞ୍ଚି ଯାଇଥିଲା । ମୋ ଗାଲରେ ଚାପୁଡ଼ା ପରେ ଚାପୁଡ଼ା ଲଗେଇ ପାପାଙ୍କ ଉପରେ ଗାଳିଗର୍ଜି କହିଲେ, “ଏ’ ଲୋକଟାର କଥାରେ ପଡ଼ି ମୋ ଜୀବନକୁ ମୁଁ ବେକାର କରିଦେଲି । ତା’ ସ୍ତ୍ରୀ ତ’ ମଲାନି, ଏ ପିଲାକୁ ମୋ ବେକରେ ବାନ୍ଧିଦେଇ ମୋ ଜୀବନକୁ ନର୍କକରି ରଖିଦେଲା ।” ସେତେବେଳେ ପାପା ମୋ ଅସହାୟପଣ ଅପେକ୍ଷା ଆଣ୍ଟିଙ୍କୁ ବୁଝେଇ ଶାନ୍ତକରିବାକୁ ଅଧିକ ତତ୍ପର ହୋଇଉଠିଥିଲେ।

ଆଣ୍ଟିଙ୍କ ସେତକ କଥାରେ ତାଙ୍କ ମାଡ଼ ମୋତେ ହଠାତ୍ କାଟିବା ବନ୍ଦ ହୋଇଗଲା । ମୋ କାନ୍ଦ ଠକ୍ କରି ତୁନି ହୋଇଯାଇଥିଲା । ତା’ପରେ କଣ ସବୁ ହେଲା କିଛି ଜାଣିପାରିନଥିଲି……

                           xxx              xxx              xxx

ଷ୍ଟେଜ୍ ଉପରୁ ମାଇକରେ ମୋ ନା’ ଡକା ହେବା ଶୁଣି ପ୍ରକୃତିସ୍ଥ ହେଲି….

ପକେଟରୁ ରୁମାଲ ବାହାରକରି ମୁହଁ ପୋଛିଲି ।  ଚେୟାରରୁ ଉଠି ଟାଏ ଓ ୟୁନିଫର୍ମକୁ ଟିକିଏ ସଜାଡ଼ିନେଇ ବୋର୍ଡିଙ୍ଗ ସ୍କୁଲର ବିଦାୟକାଳୀନ ଉତ୍ସବର ଗୃପ୍-ଫଟୋ-ସୁଟ୍ ସେସନରେ ସାମିଲ ହେବାକୁ ଆଗକୁ ବଢ଼ିଲି……