ଆଉ କିଛି ଆୟୁଷ ଦେ’ ଜୀବନ
ଭେଦିବାର ଅଛି ପ୍ରେମଡଅଁର
ଭୋଗିବାର ଅଛି କିଛି ଉଦାସପଣ
ଯେ’ଯାଏ ଭାଗଶେଷ ଶୂନ୍ ନହୋଇଛି
ଆହୁରି ଭାଗ ଭାଗ ହେବାର ଅଛି
ପ୍ରିୟଜନଙ୍କ ଲାଗି ll
ଫେରେଇ ଦେବାର ଅଛି
ଅସଲରେ ଯାହା ନାହିଁ କି କେବେ ନଥିଲା,
କାଳେ କିଛି ପାଶୋର୍ ଯାଇଥିବ
ଯାହାକୁ ଯା’ ଦେବାର ଥିଲା ll
ଆଉ କିଛି ଆୟୁଷ ଦେ’ ଜୀବନ
ଫେରେଇବାର ଅଛି
ଧାରରେ ପ୍ରାପତ ସୁଖ-ସୋହାଗ
ଫେରେଇ ଦେବାର ଅଛି
ଧାର୍ମିକ ଶାଣଦିଆ ଜାତିଗୋତ୍ର
ଫେରେଇ ଦେବାର ଅଛି ସାଞ୍ଜୁକବଚ
ଯେତେସବୁ ପୋଥିଗତ ଘୃଣ୍ୟଉବାଚ ll
ମାଫିନାମାରେ ଦେବାର ଅଛି ଦସ୍ତଖତ
ବିନ୍ଧିଥିବା ଲାଖକୁ ଫେରେଇ ଆଣିବାର ଅଛି
ମିଛ ଜୟପରାଜୟର ତୂଣୀରକୁ ,
ସବୁ ହୃଦୟଙ୍କଠାରେ କରିବାର ଅଛି କ୍ଷମାଯାଚନା
ସବୁ ଅଗଣାରେ ଫୁଟାଇବାର ଅଛି ଫୁଲ ଓ ପ୍ରାର୍ଥନା ll
ତଥାପି ବାକିଅଛି ହିସାବନିକାସ
‘ଆଜି ନଗଦ କାଲି ଉଧାରି’ ଲେଖାଥିବା
ସେଇ ଦୋକାନରେ ll
ବତେଇ ଦେବାର ଅଛି
ତିଳ ତିଳ କେମିତି ବଞ୍ଚୁଥାଏ
ଛଳ ଛଳ ଧାରଗ୍ରସ୍ତ ମଣିଷ,
ସଭାଜନଙ୍କୁ ମନଖୋଲି କହିଦେବାର ଅଛି
ହାର୍ଜିତ୍ର ରହସ୍ୟ ll
ଆଉ କିଛି ଆୟୁଷ ଦେ’ ଜୀବନ
କିଛି ମୁହୂର୍ତ୍ତଙ୍କୁ ସାଇତିବାର ଅଛି ସ୍ମୃତିର ଥାକରେ
କିଛି ଉଚ୍ଛନ୍ନବେଳକୁ ବୋଳିବାର ଅଛି କପାଳରେ
କିଛି ଭୋରପଣକୁ ଆଙ୍କିବାର ଅଛି କବିତା ଖାତାରେ
ଆଉ କିଛି ଆୟୁଷ ଦେ’ ଜୀବନ..
ଆଉ କିଛି ଆୟୁଷ ଦେ’
There are 4 comments
ଏଇ ସୁନ୍ଦର କବିତାଟି ପାଇଁ ଆମ ସମୟର ପରିଚିତ ସ୍ୱର କବି ଲକ୍ଷ୍ମୀନାରାୟଣ ହୋତାଙ୍କୁ ଅଶେଷ ଧନ୍ୟବାଦ। ଆଗକୁ ତାଙ୍କର ସହଯୋଗ ଏହିପରି ରହିବ ବୋଲି ଆଶା ରଖୁଛୁ।
ଆଉ କିଛି ଆୟୁଷ — କବିତା ମର୍ମ ସ୍ପର୍ଶିି ହୋଇଛି। ଲକ୍ଷ୍ମୀ ବାବୁ ଙ୍କୁ ଅଭିନନ୍ଦନ ଏପରି ସୃଷ୍ଟି ପାଇଁ।
ଆଉ କିଛି ଆୟୁଷ — କବିତା ମର୍ମ ସ୍ପର୍ଶିି ହୋଇଛି। ଲକ୍ଷ୍ମୀ ବାବୁ ଙ୍କୁ ଅଭିନନ୍ଦନ ଏପରି ସୃଷ୍ଟି ପାଇଁ।
ବହୁତ ସୁନ୍ଦର କବିତା ସାର 🙏